DAPITAN CITY — Gipasiugda ni Mayor Belen Uy ang patas ug organisadong pagdumala sa syudad samtang gitutokan ang kaayohan sa mga market vendors, ilabi na human sa insidente sa pagdakop sa pipila ka fish vendors nga nagbaligya sa kadalanan niadtong Marso 30.
Sumala sa otoridad, gidili ang pagpamaligya sa kalsada base sa city ordinance ug nasudnong balaod tungod sa risgo sa trapiko ug kaluwasan. Bisan pa niini, gipadayon sa lokal nga panggamhanan ang suporta sa mga vendors pinaagi sa pagbalhin kanila sa temporaryong merkado sa Dapitan City Aqua-Marine Park ug paghatag og mga programa sama sa livelihood assistance ug libreng business permits.
Giila ang DAMPA isip temporaryong solusyon samtang padayon ang plano sa pagtukod sa bag-ong merkado sa Barangay Linabo, nga gilauman mahuman sulod sa usa ngadto duha ka tuig aron mas mapahapsay ug mapalambo ang palibot sa pagpamaligya sa syudad.
Gipasiugda ni Mayor Uy nga tumong sa lokal nga panggamhanan ang pagbalanse sa pagpatuman sa balaod ug pagtabang sa panginabuhi sa mga vendors, samtang nanawagan sa tanang sektor sa kooperasyon aron mapadayon ang limpyo, luwas, ug organisadong Dapitan City.(JENIFFER JR. DELICA)
Source: Zamboanga del Norte Provincial News Network