Usa ka lig-on nga panawagan alang sa matinud-anon ug responsableng serbisyo publiko ang mensahe ni City Mayor Evelyn “Belen” T. Uy atol sa flag-raising ceremony sa City Government Lobby niadtong Agosto 17.
Gidasig ni Mayor Uy ang tanang city officials ug empleyado nga buhaton ang ilang katungdanan nga adunay patriotismo, integridad ug dedikasyon, ilabi na sa pag-atiman sa mga panginahanglan sa katawhan.
Matod sa mayor, ang matag kawani adunay importanteng papel sa pagtukod sa usa ka mas maayong Dapitan. Busa, kinahanglan nga ang matag serbisyo nga ihatag sa gobyerno mahimong hapsay, transparent ug responsive sa panginahanglan sa mga residente.
Gipasiugda usab ni Mayor Uy ang importansya sa panaghiusa tali sa mga opisyal, kawani ug partner agencies aron mas lig-on ang koordinasyon ug mas epektibo ang pagpatuman sa mga programa ug serbisyo sa siyudad.
Sa iyang panawagan, gidasig niya ang tanan nga dili lamang motuman sa ilang trabaho, kundili magserbisyo nga adunay kasingkasing, integridad ug tinuod nga pagbarug alang sa kaayohan sa katawhan.
Ang flag ceremony gitapos pinaagi sa kolektibong commitment sa mga nanambong nga magpadayon sa paghatag og matinud-anon ug episyenteng serbisyo alang sa katawhan sa Dapitan.(IKEN B. GULLEM)
Source: Dapitan City Government