Usa na usab ka dakong lakang ang nakab-ot sa katawhan padulong sa mas lig-on nga kalamboan ang naangkon sa mga lungsod sa Siocon, Sirawai, Sibuco ug Baliguian o triple SB human sa mass turn-over sa nagkalain-laing proyekto sa imprastraktura nga gipangunahan ni Congressman Ian Amatong.
Gipasiugda ni Congressman Amatong nga ang mga nahuman nga proyekto nagrepresentar sa padayon nga paningkamot sa pagdala og serbisyo nga duol sa katawhan, ilabi na sa mga komunidad nga dugay nang nanginahanglan og lig-on nga dalan, tulay ug proteksyon batok sa baha.
Sa Sibuco, lakip sa gitunol ang flood control structures sa Malayal ug Sibuco rivers, multi-purpose building sa Poblacion, ug mga proyekto sa rehabilitasyon ug pagpalapad sa dalan. Dako kining tabang sa pagpakunhod sa peligro sa baha ug sa pagpasayon sa pagdala sa produkto sa mga mag-uuma ngadto sa merkado.
Sa Sirawai ug Siocon, nahuman ang tulay sa Cawit-Cawit, mga by-pass ug diversion roads, riverbank protection works, ug dugang flood control projects nga maghatag og mas luwas nga agianan sa mga motorista ug mas maayong proteksyon sa mga umahan.
Samtang sa Baliguian, gipasinayaan ang rehabilitasyon sa dalan sa Barangay Kauswagan ug flood mitigation project sa Barangay Mamad aron mapanalipdan ang komunidad batok sa kusog nga ulan ug pagbaha.(IKEN B. GULLEM)
Source: Zamboanga del Norte Provincial News Network