Gipahigayon sa Provincial Agriculture Office ang usa ka konsultasyon ug information dissemination activity alang sa mga residente sa kabaybayonan sa Purok Gampis, Barangay Sicayab niadtong Hunyo 5 aron hisgutan ang mga epekto sa gitawag nga “Paulbo Fishing.”
Gipangulohan ang maong kalihokan sa opisina ni Acting Provincial Agriculturist Armie B. Bergado isip tubag sa kabalaka nga gipadayag sa mga residente pinaagi sa sulat nga gisumite ngadto kang Barangay Chairman Joe Chris Empal.
Atol sa dayalogo, gipatin-aw sa Provincial Agriculture Office ang negatibong epekto sa “Paulbo Fishing” sa kahimtang sa kadagatan ug sa mga yamang-dagat, ilabina sa pagpreserbar sa mga isda ug uban pang marine resources nga nagsilbing panginabuhian sa mga komunidad sa baybayon.
Tungod niini, mipasalig ang Barangay Sicayab nga mas palig-onon pa ang pagbantay ug pagpanalipod sa ilang coastal areas aron masiguro ang malungtarong paggamit sa mga bahandi sa dagat ug malikayan ang mga pamaagi sa pagpangisda nga makadaot sa kinaiyahan.(IKEN B. GULLEM)
Source: Barangay Sicayab Dipolog City