Nakadawat og livelihood training sa rag making ang mga miyembro sa Mamawan Women’s Association sa Barangay Mamawan niadtong Marso 16, isip kabahin sa paningkamot sa kapulisan ug mga ahensya sa gobyerno nga makahatag og dugang panginabuhian sa komunidad.
Gipahigayon ang training sa Zamboanga del Norte 2nd Provincial Mobile Force Company pinaagi sa RCSP Team ubos sa pagdumala ni Force Commander PLTCOL Edwin D. Verzon, sa pakigtambayayong sa barangay nga gipangulohan ni Barangay Captain Glenn Pascual.
Tumong sa training nga hatagan og praktikal nga kahanas ang mga kababayen-an aron mahimo kini nilang dugang nga panginabuhian ug makatabang sa ilang pamilya.
Kini nga technical training gipangunahan ni Joelit P. Dinapo gikan sa Technical Education and Skills Development Authority (TESDA), nga nagtudlo sa hustong pamaagi sa paghimo og mga rag gikan sa ginamit o sobra nga panapton.
Gilauman usab nga pinaagi sa maong programa, mapalig-on ang ekonomikanhong kahimtang sa komunidad samtang ginadasig ang aktibong partisipasyon sa mga residente sa mga programa sa gobyerno.(IKEN B. GULLEM)
Source: Zamboanga del Norte 2nd PMFC