Gibansay ang 54 ka kabatan-onan gikan sa Dapitan ug Dipolog sa skimboarding isip kabahin sa usa ka programa nga nagtumong sa pagpalambo sa coastal tourism, environmental awareness ug drug prevention sa probinsya.
Gipahigayon ang Skimboarding Clinic and Certification Program niadtong Marso 15, 2026 sa Alexandra by the Sea Function Hall, nga gi-organisar sa lokal nga kagamhanan sa Dapitan ug Dipolog ubos sa pagpangulo nila Dapitan Mayor Evelyn T. Uy ug Dipolog Mayor Roberto Y. Uy, sa pakigtambayayong sa Provincial Government sa Zamboanga del Norte nga gipangulohan ni Gov. Darel Dexter Uy.
Gipahigayon usab kini kauban ang Department of Tourism (DOT) Region IX, Philippine Drug Enforcement Agency (PDEA) Region IX ug Department of Environment and Natural Resources (DENR).
Human sa oryentasyon sa safety ug teknik, gipraktis sa mga partisipante ang skimboarding sa Sunset Boulevard ubos sa supervision sa mga eksperto. Gipahigayon usab ang drug awareness session nga gipangunahan ni PDEA Agent May M. Saband, diin gipasiugda ang kahinungdanon sa drug-free nga sports community.
Samtang bahin sa kalikupan, naghatag og orientation si DENR Forester II David J. Manjaal mahitungod sa husto nga pag-atiman sa baybayon, pagpanalipod sa marine ecosystem ug sakto nga pagdumala sa basura.
Natapos ang programa pinaagi sa pag-organisa sa skimboarding associations sa Dapitan ug Dipolog aron manguna sa umaabot nga mga aktibidad sa sport.(IKEN B. GULLEM)
Source: City Government of Dapitan