Nangayo og tabang ug suporta ang mga magtutudlo sa Matematika sa Zamboanga del Norte National High School (ZNNHS) – Turno Math Department alang sa pag-establisar sa ilang giplanong Math Center sa Dipolog City.
Atol sa courtesy visit nga gipahigayon niadtong Pebrero 19, 2026, mibisita ang mga magtutudlo sa opisina ni Mayor Roberto Y. Uy aron ipahibalo ang kasamtangang kalamboan sa ilang departamento ug ipresentar ang ilang plano sa pagtukod sa usa ka Math Center.
Gilauman nga pinaagi niini, mas mapalig-on ang kalidad sa pagtudlo ug pagkat-on sa subject, ilabi na sa mga estudyanteng nanginahanglan og dugang nga academic support ug enrichment activities.
Gipasiugdahan usab sa mga magtutudlo nga ang suporta sa lokal nga panggamhanan dako og papel sa pagpadayon sa maong inisyatibo, nga tumong sa pag-angat sa performance sa mga estudyante sa matematika ug sa paghimo sa eskwelahan nga mas andam sa mga hagit sa modernong edukasyon.(IKEN B. GULLEM)
Source: Dipolog City Government