Tulo ka libo (3,000) ka bangus o milkfish fingerlings ang nga gibuhian sa Dapitan Aqua Marine Park (DAMPA) isip kabahin sa pagpangandam sa umaabot nga Charter Day Bangus Festival sa Dapitan City.
Gipangunahan ang maong kalihokan ni Evelyn T. Uy, kinsa personal nga mitambong sa pagbuhi sa mga fingerlings nga gigikanan sa Olingan Fisheries. Kauban niya si City Councilor Hon. Dennis Tan, Chairman sa Committee on Agriculture, ug ang mga kawani sa City Agriculture Office.
Gibutang ang mga fingerlings sa usa ka giandam nga culture area sulod sa DAMPA aron mapatubo ug maandam alang sa selebrasyon sa Hunyo. Sumala sa lokal nga panggamhanan, kabahin kini sa padayong pagpalig-on sa aquaculture program sa siyudad ug pagsiguro sa malungtarong suplay sa bangus alang sa pista.
Mitambong usab ang mga Work Immersion students gikan sa Baylimango National High School nga nakig-apil sa kalihokan isip kabahin sa ilang praktikal nga pagkat-on.
Gipasiugda sa City Government of Dapitan nga ang maong inisyatibo naglangkob dili lamang sa pagpangandam alang sa Bangus Festival, kondili usab sa paghatag og dugayng benepisyo sa mga mangingisda ug sa pagpalig-on sa seguridad sa pagkaon ug ekonomiya sa siyudad.(IKEN B. GULLEM)
Source: City Government of Dapitan