Gisuportahan sa Provincial Government of Zamboanga del Norte ang lima ka batan-ong chess players gikan sa Dipolog City Chess Association nga moapil sa 2026 ASEAN Age Group Chess Championship sa Singapore.
Mibisita sa opisina ni Governor Darel Dexter T. Uy ang mga batang atleta niadtong Hulyo 17 isip pagpangandam sa ilang pag-apil sa maong kompetisyon. Kini sila mao sila Elisha Romarate sa Under-6 division, Aille Vincent Reguya sa Boys Under-12, Aryana Genelle Embodo sa Girls Under-12, Dale Christian Uy sa Boys Under-14, ug Princess Rane Magallanes sa Girls Under-14.
Gipadayag sa Provincial Government ang ilang suporta sa mga batan-ong atleta nga nagdala sa ngalan sa probinsya sa internasyonal nga kompetisyon. Gipangandoy usab nila ang kalampusan sa delegasyon samtang nagrepresentar sa Zamboanga del Norte sa ASEAN tournament.
Padayon nga gidasig ang mga batang chess players nga ipakita ang ilang abilidad, determinasyon, ug maayong pamatasan atol sa ilang pag-apil sa kompetisyon sa Singapore.(JENIFFER JR. DELICA)
Source: Provincial Government of Zamboanga del Norte