Nakatanom og kapin 1,400 ka mangrove ug kahoy ang Philippine Red Cross–Zamboanga del Norte Chapter pinaagi sa Red Cross Youth atol sa duha ka magkasunod nga kalihokan sa Piñan ug Rizal aron makatabang sa pagpanalipod sa kalikupan ug pagpakunhod sa epekto sa mga kalamidad.
Niadtong Hulyo 16, 400 ka kahoy ang gitanom sa Sitio Sicoco, Barangay Del Pilar, Piñan aron makatabang sa pagpasig-uli sa kalasangan ug pagpanalipod sa tinubdan sa tubig. Gisundan kini niadtong Hulyo 17 sa pagtanom og 1,000 ka mangrove sa Barangay Nangca, Rizal aron mapanalipdan ang baybayon batok sa erosion ug makatabang sa pagpreserbar sa kinabuhi sa kadagatan.
Nahimong posible ang maong mga kalihokan pinaagi sa panagtinabangay sa Provincial Disaster Risk Reduction and Management Office, Provincial Environment and Management Office, mga lokal nga panggamhanan sa Piñan ug Rizal, ug ilang Municipal Disaster Risk Reduction and Management Offices.
Sumala sa Philippine Red Cross–Zamboanga del Norte Chapter, kabahin kini sa ilang padayon nga paningkamot sa pag-awhag sa kabatan-onan sa aktibong pag-atiman sa kalikupan ug pagpalig-on sa kahandaan sa komunidad batok sa mga kalamidad.(JENIFFER JR. DELICA)
Source: Red Cross Youth- Zamboanga del Norte Chapter