Gitubag sa Shift B EMS personnel sa Liloy Municipal Fire Station ang usa ka emergency medical response sa Liloy National High School, Barangay Fatima, Liloy, Zamboanga del Norte human kalit nga natumba ang usa ka estudyante.
Pag-abot sa mga responder, ilang nakit-an ang estudyante nga naglingkod sa lingkuranan, adunay panimuot apan wala dayon motubag sa tawag. Sumala sa class adviser, kalit kining nawad-an og balanse sa wala pa miabot ang EMS team.
Gihimo dayon ang unang pagsusi sa kahimtang sa pasyente ug gisukod ang iyang vital signs. Gibalhin siya ngadto sa ambulansya ug gipahimutang og tarong samtang padayon nga gibantayan sa EMS personnel ang iyang kahimtang.
Mihapsay ang kahimtang sa estudyante human sa pag-atiman sa mga responder. Apan iyang gibalibaran ang pagdala ngadto sa duol nga pasilidad panglawas human ipahibalo ang posibleng risgo sa dili pagpa-checkup. Gihatagan usab siya og tambag nga mangayo dayon og medikal nga tabang kung mobalik ang gibati nga sintomas o mograbe ang iyang kahimtang.(JENIFFER JR. DELICA)
Source: BFP R9 Liloy Fire Station