Gilusad kagahapon, Oktubre 23, 2025, ang lima ka bag-ong modernong pampublikong sakyanan ubos sa programa sa modernisasyon sa transportasyon nga gipasiugdahan sa Land Transportation Franchising and Regulatory Board (LTFRB) sa D’Food Hub and Events Center sa Dipolog Boulevard, Barangay Miputak, ning siyudad.
Gipangulohan sa LTFRB Regional Director Tommy M. Macadindang ang kalihukan uban sa mga opisyal gikan sa Dipolog, Dapitan, Liloy, ug Sirawai nga nagpahayag sa ilang suporta ug pagpasalamat sa proyekto.
Tulo sa mga gilusad mao ang modernong jeep nga may 25 ka lingkuranan nga mulihok sa rota nga Dipolog–Dapitan, samtang duha niini mao ang modernong bus nga may 51 ka lingkuranan nga mobiyahe paingon sa Siocon ug Ipil. Ang maong kalamboan nagtimaan sa padayon nga paningkamot sa gobyerno aron mapauswag ang luwas, komportable, ug episyenteng biyahe alang sa mga pasahero sa Zamboanga del Norte.(Jeniffer Jr. Delica)
Source/Photo Courtesy: Dipolog City Government