Gidayeg sa Liloy Municipal Police Station (MPS) si Mr. Johny Indanan, residente sa Gutalac, Zamboanga del Norte tungod sa iyang pagkamatinud-anon ug responsableng pagbuhat human niya personal nga gi-turn over ang usa ka Driver’s License nga iyang nakit-an.
Ang maong ID nakit-an ni Mr. Indanan sa Mamawan, Baliguian ug dayon niyang gidala sa Liloy MPS. Sumala sa kapulisan, ang Driver’s License gipanag-iya ni Mr. Rudyl Gom-os Guiron, residente sa Barangay San Miguel, Liloy, Zamboanga del Norte.
Matod sa Liloy MPS, ang buhat ni Mr. Indanan usa ka maayong ehemplo sa kooperasyon sa komunidad ug nagpakita sa tinuod nga diwa sa pagkamatinud-anon nga makatabang sa pagpalig-on sa pagsalig sa publiko ug kaluwasan.
Gipahibalo usab sa kapulisan nga ang tag-iya sa Driver’s License mahimong moduol sa Liloy Municipal Police Station aron makuha ang iyang ID, uban ang hustong pruweba sa identidad alang sa beripikasyon.(IKEN B. GULLEM)
Source: Liloy Municipal Police Station-ZNPPO