DAVAO DEL NORTE — Nanganti ang hepe sa Tagum City Traffic Management Unit (TCTMU) nga si Francisco Sevilles Jr. nga hugot nilang ipatuman ang pagdakop sa mga masinupakon sa balaod trapiko, ilabi na sa mga dili mutuman sa mga bag-ong gimuntar nga traffic lights sa siyudad.
Matod ni Sevilles, sa pagkakaron anaa pa sa dry run ang mga bag-ong traffic lights aron ma-edukar ang mga motorista sa hustong paggamit niini, mao nga wala pa sila manakop niining panahona.
Apan iyang gipatin-aw nga sa higayon nga opisyal na kining ipatuman sa ilang buhatan, wala nay pasaylo ang mga motorista nga mopasipala sa balaod trapiko.
Aminado ang opisyal nga daghan pa gihapon ang mga badlungong drayber sa Tagum City nga dili mutuman sa mga traffic warning signs, bisan pa man nga klaro ug hayag ang mga pahimangno.
Lakip sa kasagarang kalapasan ang pag-agi sa no entry, pagliko sa wala o tuo bisan og gidili, pagpadayon sa pagdagan bisan naka-red light na ang traffic lights, ug uban pang mga buhat nga posibleng mosangpot sa disgrasya.
Padayon ang panawagan sa TCTMU sa mga motorista nga magbinantayon ug motuman sa balaod trapiko aron malikayan ang aksidente ug mapadayon ang kahapsay sa trapiko sa siyudad.(Camille Santos Naraga)(Source: Contributed)