Gidawat sa Lokal nga Kagamhanan sa Liloy, ubos sa pagpanguna ni Mayor Roberto Lim Uy Jr., ang mga beteranong Amerikano nga si Fr. Francis Lowe ug Mr. Edmundo Santa Maria, nga migikan pa sa Estados Unidos alang sa usa ka makasaysayanong memorial mission. Apil usab sa pagbisita si Bishop Ver Caermare ug Rev. Fr. Simplicio Lomarda Jr., isip pagpakita sa paghiusa sa pagtuo ug kasaysayan.
Gipahinumdoman sa kalihukan ang paglunod sa Japanese hellship Shinyu Maru sa baybayon sa Liloy niadtong Septiyembre 7, 1944, usa ka trahedya sa Ikaduhang Gubat sa Kalibutan nga mipatay sa gatusan ka mga Prisoners of War, lakip ang U.S. Air Force Chaplain nga si Rev. Fr. Joseph Verbis Lafleur, kinsa giila isip Servant of God.
Isip kabahin sa pagpreserba sa kasaysayan, gipahigayon ang ocular inspection kauban ang Department of Public Works and Highways ubos sa pagpanguna ni Engineer Petros Credo, alang sa planong pagtukod og memorial site. Ang inisyatiba nagtinguha nga pasidunggan ang mga namatay, palig-onon ang pagtuo, ug ipadayon ang panumduman sa usa ka hinungdanong bahin sa kasaysayan sa Liloy.(JENIFFER JR. DELICA)
Source: Municipality of Liloy