Mibisita si Cong. Adrian Amatong sa Philippine Economic Zone Authority (PEZA) kagahapong adlawa, Nobyembre 19, 2025, alang sa usa ka miting uban ni Director General Tereso Panga, kauban ang mga representante sa LGU Liloy nga gipangulohan ni Arch. Gaco, ug Syntegral Global Solutions CEO, Bryan Thomas.
Ang panagtagbo nagtutok sa sunod nga mga lakang alang sa Liloy Ecozone, diin gihisgutan ang koordinasyon sa mga proyekto, pagplano, ug pagpangandam sa umaabot nga mga pamuhunan nga makahatag ug dako nga benepisyo sa mga katawhan sa 3rd District sa Zamboanga del Norte. Giila sa mga partisipante ang kahinungdanon sa lig-on ug organisadong plano aron masiguro nga ang Ecozone mahimong usa ka sentro sa negosyo ug trabaho nga makapalambo sa ekonomiya sa distrito.
Gipasiugda usab sa miting ang kolaborasyon tali sa LGU Liloy, PEZA, ug mga pribadong kompanya, aron mahatagan ug tukmang suporta ang mga investors ug malikayan ang mga kalangan sa implementasyon sa proyekto.
Gilauman nga ang 2026 mahimong usa ka malampuson nga tuig, diin magpadayon ang kusog nga partnership ug modako pa ang mga oportunidad alang sa mga negosyo ug komunidad sa Liloy Ecozone.(IKEN B. GULLEM)
Source: Team Adrian Amatong