Nangayo og pag-uli si Cebu Governor Pamela Baricuatro sa ₱712 milyon nga housing assistance gikan sa National Housing Authority (NHA) nga kaniadto gi-allocate para sa mga biktima sa Super Typhoon Odette apan nauli sa National Treasury tungod sa kasabutan nga wala magkahuman sa milabay nga administrasyon sa Capitol.
Sa iyang sulat, giingon ni Gob. Baricuatro nga ang maong kantidad angay gyud madawat sa mga nalambigit nga Sugboanon bisan og nilabay ang pipila ka tuig. Ang sulat gipetsagan sa Nobyembre 18, 2025 ug gi-address ngadto kang NHA General Manager Joeben A. Tai, pinaagi sa NHA-7 Manager nga si Engr. Hermes Jude D. Juntilo.
Ang wala panag-uyon nagsugod sa lain-laing paagi sa pag-apod-apod sa tabang nga para unta sa 72,209 ka panimalay nga naigo sa bagyong Odette niadtong Disyembre 2021. Giplano sa NHA nga i-direct cash disbursement ang ₱10,000 ngadto sa matag kwalipikadong panimalay base sa listahan sa Office of Civil Defense. Apan ang milabay nga administrasyon sa probinsya gusto nga ang LGU maoy mo-implementar sa programa ug ipaagi ang paghatag sa Dasig Sugbo Card imbes cash.
Si Engr. Juntilo miingon nga ang pagbaton sa probinsya sa implementasyon makalapas sa Ehap guidelines ug posibleng mosangpot sa audit findings, alegasyon sa misuse sa pondo, ug dili regular nga pag-apod-apod. Giila usab niya nga gisalikway sa NHA Central Office ang hangyo sa Capitol nga sila maoy mohandle sa distribusyon, hinungdan nga nauli ang pondo sa National Treasury.
Kon aprobahan ang apela, mopadayon si Gov. Baricuatro sa pakigdool sa NHA-7 aron ma-uyon ang datos ug masiguro ang hapsay nga pag-apod-apod sa pinansyal nga tabang ngadto sa tanang apektadong pamilya.
Source: Cebu Province PIO
I via Renante Socia Lada