Gidasig sa Department of Health (DOH)-Zamboanga Peninsula Center for Health Development (ZPCHD) ang tanang pampubliko ug pribadong health facilities sa rehiyon nga palig-onon ang mga lakang batok sa impeksyon atol sa pagsaulog sa National Infection Prevention and Control (IPC) Week gikan Hulyo 6 hangtod 10.
Kabahin kini sa National IPC Week 2026 nga adunay temang “Building Responsive IPC Systems: Strengthening, Monitoring, Collaboration, and Resilience” nga nagtumong sa pagpalig-on sa pagmonitor, koordinasyon, ug kalig-on sa mga sistema sa infection prevention aron masiguro ang luwas ug dekalidad nga serbisyo panglawas.
Sumala sa DOH, ang pagpugong sa impeksyon dili lamang responsibilidad sa usa ka ospital o pasilidad kondili usa ka hiniusang katungdanan sa tanang healthcare workers ug health facilities.
Girekomenda usab sa ahensya ang pagpatuman sa mga information campaign ug educational activities, lakip ang pagtudlo sa hustong hand hygiene, sakto nga paggamit sa personal protective equipment (PPE), waste segregation, ug uban pang pamaagi sa pagpugong sa impeksyon aron mapalambo ang kahibalo sa publiko ug mapalig-on ang kultura sa kaluwasan sa tanang pasilidad panglawas.(IKEN B. GULLEM)
Source: Zamboanga del Norte Provincial News Network