Aron mapaspasan ang digitalisasyon sa mga yutang sakop sa agraryong reporma, gipahigayon sa Department of Agrarian Reform (DAR) Zamboanga del Norte ang pagbansay sa mga geodetic engineers, drafters, ug personnel nga nagdumala sa survey operations sa paggamit sa ArcGIS Pro sa DAR Provincial Office sa Dipolog City.
Tumong sa pagbansay ang pagpalambo sa kahibalo sa mga partisipante sa pag-andam, pag-digitize, pag-edit, pag-validate, ug pagmapa sa mga yutang sakop sa Emancipation Patents (EPs), Certificates of Land Ownership Award (CLOAs), ug Project SPLIT.
Pinaagi niini, gitinguha sa DAR ang paghimo og usa ka tukma, estandardisado, ug malungtarong Geographic Information System (GIS) database alang sa mga yutang agraryo sa Region 9.
Gilauman usab sa ahensya nga ang pagpalig-on sa teknikal nga kapasidad sa mga personnel sa probinsiya makatabang sa mas paspas nga pagproseso sa digital nga land records ug mas episyenteng pagpatuman sa mga programa sa agraryong reporma.(IKEN B. GULLEM)
Source: DAR Zamboanga del Norte Province