Mibisita ang mga opisyales sa Department of Trade and Industry (DTI) sa probinsya sa Dipolog City aron mapalig-on ang kooperasyon sa lokal nga gobyerno sa pagpalambo sa negosyo ug industriya sa syudad.
Gipangulohan ni Estrella M. Roda, Provincial Director sa DTI Zamboanga del Norte, ang delegasyon nga mibisita kang Mayor Roberto Y. Uy, sa City Mayor’s Office niadtong hapon sa Marso 11, 2026.
Kauban ni Provincial Director Roda sa maong pagbisita sila Raymunda B. Biolango, Business Development Division Chief; Daisy Mae O. Tambolero, Trade Industry Development Specialist ug Shared Service Facility (SSF) focal person; ug Alexander Batilong, market supervisor.
Tumong sa panagtagbo sa pagpalig-on sa koordinasyon tali sa ahensya ug sa city government aron mapalambo pa ang mga programa alang sa lokal nga negosyo, lakip na ang suporta sa mga micro, small and medium enterprises (MSMEs) sa syudad.
Gilauman nga pinaagi sa mas lig-on nga panagtambayayong sa DTI ug sa lokal nga panggamhanan, mas mapalapad pa ang mga inisyatiba nga maghatag og dugang oportunidad sa mga negosyante ug makatabang sa pag-uswag sa ekonomiya sa Dipolog City ug sa tibuok Zamboanga del Norte.(IKEN B. GULLEM)
Source: Dipolog City Government