Dungan sa kasaulogan sa Araw ng Kagitingan karong Abril 9, 2026, ipahigayon ang usa ka libreng medical outreach alang sa mga surviving spouses sa beterano, retirees ug ilang mga pamilya dinhi sa dakbayan.
Pagabuhaton ang kakihokan sa 2nd Floor sa Museo Dipolog sugod alas 9:00 sa buntag hangtod alas 2:00 sa hapon, diin gilauman nga mokabat sa kapin 250 ka benepisyaryo ang matagaan og libreng konsultasyon, tambal ug bitamina.
Kini nga outreach usa ka paagi sa paghatag og mas duol ug sayon nga access sa serbisyong panglawas alang sa mga beterano ug ilang mga mahal sa kinabuhi, ilabi na sa mga tigulang ug adunay limitasyon sa pag-adto sa mga health facilities.
Ang inisyatibo gipasiugdahan usab sa Sons and Daughters of Veterans sa pakigtambayayong sa Veterans Federation of the Philippines – Dipolog City District, regional office niini, ug sa City Government of Dipolog pinaagi sa City Health Office.
Giawhag ang tanang kwalipikadong benepisyaryo nga mopahimulos sa libreng serbisyo nga ilugway alang kanila niining mahinungdanong adlaw.(IKEN B. GULLEM)
Source: Dipolog City Government