Ipatuman karong Nobyembre 12, 2025 (Miyerkules) ang Libreng Check-Up para sa Libreng Opera ubos sa programa nga “Libreng Opera ni Gov. Darel,” isip padayon nga paningkamot sa probinsyal nga pangagamhanan sa Zamboanga del Norte sa paghatag ug patas, duol, ug makataong serbisyo pangkahimsog alang sa tanang ZaNortehanon.
Ang Zamboanga del Norte Medical Center (ZNMC) mag-abli sa serbisyo gikan alas-8 sa buntag hangtod alas-11 sa Outpatient Department sa Sicayab, Dipolog City, diin pagabuhaton ang screening sa mga pasyente nga posibleng makakwalipikar sa umaabot nga libreng operasyon human sa hustong assessment ug ebalwasyon sa mga espesyalista.
Gi-awhag sa Kapitolyo ang publiko nga mopahimulos sa libreng konsultasyon aron masusi sa mga doktor kung angayan ba sila para sa libreng operasyon ubos sa maong programa, nga naglakip sa pag-atiman sa mga eksperto sama nila Dr. Jonathan Navarro, Dr. Michael Burdador, Dr. Paul Serios, ug Dr. Imeldo Gamallo.
Sumala sa ZNMC Medical Team, ang libreng check-up maghatag ug oportunidad nga maila ang tin-aw nga kahimtang sa pasyente ug maplano ang posibleng operasyon.(IKEN B. GULLEM)