Iipahigayon karong Miyerkules, Septyembre 16, 2026, ang libreng check-up alang sa mga pasyenteng nanginahanglan og Neuro ug Spine consultation sa Zamboanga del Norte Medical Center (ZNMC) Out-Patient Department (OPD).
Kabahin ang medical mission sa mga serbisyo sa panglawas nga gipatuman sa Provincial Government of Zamboanga del Norte ubos sa administrasyon ni Governor Darel Dexter T. Uy.
Pangunahan ang konsultasyon ni Dr. Alain Salloman, Neuro ug Spine Surgeon, nga maghatag og espesyalista nga ebalwasyon alang sa mga kondisyon nga may kalabotan sa utok, dugokan, nerbiyos, liog ug likod.
Sugod alas 8:00 sa buntag, pagadawaton ang mga pasyente alang sa konsultasyon ug medical evaluation aron matino ang angay nga pag-atiman ug posibleng pamaagi sa pagtambal base sa ilang kahimtang.
Gitumong sa maong serbisyo nga mapaduol ngadto sa mga residente sa probinsya ang espesyalista nga medical consultation, ilabina alang sa mga pasyenteng adunay mga sintomas o kondisyon nga may kalabotan sa neuro ug spine.
Giawhag usab ang mga residente nga adunay padayong kasakit sa likod o liog, pamamanhid sa kamot o tiil, kalisod sa paglihok, ug uban pang sintomas nga may kalabotan sa nerbiyos ug dugokan nga magpahimulos sa maong serbisyo.(IKEN B. GULLEM)
Source: Zamboanga del Norte Provincial News Network