Doble ang kadaugan sa LGU Polanco ug LGU Sibutad atol sa opening ceremony sa 17th Inter-Government Agency Sportsfest (IGAS) nga gipahigayon niadtong Setyembre 14, 2026, sa City Government Center Grounds.
Gipakita sa LGU Polanco ang ilang kusog, disiplina ug panaghiusa human ilang nasungkit ang Grand Champion sa Saludo Competition, diin 19 ka delegasyon ang nagkompetensya.
Nangibabaw ang Polanco pinaagi sa ilang hapsay nga koordinasyon, tukmang lihok ug makapadani nga showmanship nga nakakuha sa pagdayeg sa mga hurado.
Samtang, LGU Sibutad usab ang mipatigbabaw sa ilang kaugalingong paagi human ilang gidaog ang Best in Costume nga espesyal nga pasidungog. Nakadani ang ilang mamugnaon ug makaiikag nga uniporme atol sa parade ug presentation.
Ang duha ka delegasyon nahimong highlight sa opening salvo sa 17th IGAS, diin ilang gipakita nga ang panaghiusa, pagkamamugnaon ug dedikasyon mahimong dalan ngadto sa kalampusan.
Giproklamar ni Civil Service Commission (CSC) Zamboanga del Norte Provincial Director Atty. Jerry N. Mayormita ang mga mananaog, samtang sila Governor Darel Dexter T. Uy ug Siayan Mayor Alberto “Ali” Bongcawel nanguna sa paggawad sa mga tropeyo ug pasidungog.
Para sa Polanco ug Sibutad, ang maong mga pasidungog dili lamang mga titulo, kondili simbolo sa ilang paningkamot ug panaghiusa isip mga kawani sa lokal nga pangagamhanan.(IKEN B. GULLEM)
Source: Dapitan City Government