Isip kabahin sa Handog ng Pangulo: Serbisyong Sapat Para sa Lahat, gilunsad sa Department of Information and Communications Technology (DICT) Regional Office IX & BASULTA ang Free Wi-Fi for All sa lima ka lokasyon sa lungsod sa Godod.
Ang libreng internet connection gibutang sa Godod Municipal Hall, Sioran Elementary School, Godod National High School, Lomogom Elementary School, ug Bunawan Elementary School, aron mas mapalapad ang access sa internet alang sa komunidad.
Gipangulohan ang paglunsad ni DICT Region IX & BASULTA Regional Director Cheryl C. Ortega, uban si OIC-TOD Chief Engr. Mark Ruelson Gacutan ug DICT Zamboanga del Norte Provincial Officer Aileen G. Padao.
Misalmot usab sa maong kalihokan si 3rd District Representative Hon. Adrian Michael Amatong ug Godod Mayor Hon. Richie Uy, uban sa mga opisyal ug partner nga mitabang sa pagpatuman sa programa.
Dungan sa paglunsad sa Free Wi-Fi, nagpahigayon usab ang DICT og Cybersecurity and Data Privacy Seminar alang sa mga residente. Tumong niini nga mahatagan ang komunidad og kahibalo sa pagpanalipod sa personal nga datos ug paggamit sa internet sa mas luwas ug responsableng paagi.
Pinaagi sa maong inisyatibo, mas gihatagan og kahigayonan ang mga estudyante, magtutudlo, kawani sa gobyerno ug ubang residente nga makabenepisyo sa digital connectivity alang sa edukasyon, komunikasyon ug serbisyo publiko.
Ang paglunsad sa Free Wi-Fi for All sa Godod nagtimaan sa dugang nga lakang sa pagpalapad sa digital access sa mga komunidad ug sa paghatag og mas patas nga oportunidad sa mga Pilipino nga makakonektar sa digital world.(IKEN B. GULLEM)
Source: DICT IX BASULTA