Mokabat sa ₱10 milyon nga kantidad sa serbisyo, ayuda ug mga oportunidad gikan sa nagkalain-laing ahensya sa gobyerno ang gipaduol karong adlawa sa mga residente sa Zamboanga del Norte pinaagi sa “Handog ng Pangulo: Serbisyong Tapat Para sa Lahat.”
Gipahigayon ang kalihokan sa Zamboanga del Norte Convention and Sports Center, diin gitapok sa usa ka lugar ang nagkalain-laing serbisyo sa gobyerno aron mas dali kining ma-access sa katawhan.
Kabahin kini sa nationwide initiative nga nagtimaan sa adlawng natawhan ni Presidente Ferdinand R. Marcos Jr.
Lakip sa mga serbisyo ug programa nga gitanyag ang healthcare, employment, livelihood, agriculture, education ug social protection, lakip ang uban pang importanteng serbisyo alang sa publiko.
Mitampo usab ang Provincial Government of Zamboanga del Norte pinaagi sa paghatag og libreng tambal, medical check-up ug uban pang serbisyo publiko.
Lakip sa mga mipahimulos sa programa ang mga jobseeker, mag-uuma, estudyante, senior citizen ug mga pamilya gikan sa nagkalain-laing bahin sa probinsiya.
Pinaagi sa maong inisyatiba, nagkahiusa ang nagkalain-laing ahensya sa gobyerno aron mahatagan ang mga residente og serbisyo, tabang ug oportunidad—tanan sa usa ka lugar ug sulod sa usa ka adlaw.(IKEN B. GULLEM)
Source: Provincial Government of Zamboanga del Norte