Naghiusa sila Governor Darel Dexter T. Uy, Congressman Ian A. Amatong, ug Mayor Richie Uy sa pagturn-over sa nagkalain-laing proyekto alang sa agrikultura, imprastraktura ug serbisyo sa komunidad sa Godod niadtong Septiyembre 15, 2026.
Lakip niini ang ₱80-milyon nga farm-to-market road, abaca processing equipment, solar lights, multi-purpose center ug mga pasilidad sa suplay sa tubig nga gitumong aron makatabang sa mga mag-uuma ug residente.
Nanguna sa mga proyekto ang 3.45-kilometro nga Sianan–Lomogom Farm-to-Market Road nga gipondohan sa LGU-Godod ug gilauman nga makabenepisyo sa 294 ka panimalay. Makatabang kini sa mas paspas nga pagbiyahe ug pagdala sa mga produktong agrikultural sama sa goma, lubi, mais, humay ug utanon ngadto sa mga merkado ug sentro sa komersyo.
Giapil usab sa turnover ang Abaca Spindle Stripping Machine alang sa mga mag-uuma sa Barangay Sianan pinaagi sa PhilFIDA Regional Office IX, ingon man ang solar lights alang sa Guisapong, Banuangan, Poblacion, Sioran (Sitio Galos), Sianan ug Mausawagon nga mokabat sa ₱4.79 milyon.
Giturn-over usab ang Multi-Purpose Center sa Mausawagon ug mga pasilidad sa tubig sa Rambon nga gipondohan sa Provincial Government of Zamboanga del Norte.
Misaksi sa kalihokan sila Vice Mayor Roldan Molate, mga miyembro sa Sangguniang Bayan, mga barangay officials, DA Regional Technical Director IX Melba Wee ug PhilFIDA Regional Director Keven Badon. Ang mga proyekto nagpakita sa panagtinabangay sa nagkalain-laing lebel sa gobyerno aron mapalambo ang agrikultura, imprastraktura ug panginabuhian sa mga komunidad sa Godod.(IKEN B. GULLEM)
Source: Zamboanga del Norte Provincial News Network