Malampusong nasikop sa mga personahe sa PNP, nga gipangulohan ni PSMS Ernesto Neri Sevilla Jr. kauban ni PCpl Elmer Verano Jr., Defender Mobile crew,sa gipahigayong pursuit operation ang usa ka Lalaki kinsa gikataho nga suspek sa pag pangdunggab mga alas 10:50 sa kagabhion niadtong Dominggo,Mayo 12,2024 didto Purok Ofisco, Brgy. Olingan, ning dakbayan sa Dipolog.
Ang maong dinakpan giila nga si Anulfo Tabiliran Arias, 46 anyos, lalaki, minyo, usa ka mason ug residente sa Purok Ofisco, Brgy. Olingan, Dipolog City.
Samtang ang biktima naila nga si Fredie Rodriguez Arias, 46 anyos, lalaki, minyo, ug residente sa Purok Ofisco, Brgy. Olingan, dakbayan sa Dipolog.
Matod sa kapulisan, nakadawat sila ug taho gikan sa usa ka concerned citizen kabahin sa insidente sa pagpanunggab nga nahitabo sa nahisgotang lugar diin dali gilayon kining girespondehan.
Sa inisyal nga imbestigasyon nasayran nga ang biktima nga si Fredie nagsaulog sa unang adlaw nga natawhan sa iyang anak sa iyang balay.
Ug gihangyo matod pa sa usa ka enhinyero nga manganta ug gidala sila ni Fredie sa balay niini samtang gibitbit ang usa sa iyang magulang nga mga anak nga babaye.
Dugang pa, nakig-inom na ang suspek nga si Arnulfo T. Arias ngadto sa mga higala niini sa naasoy nga videokehan ug diha nakabantay ang biktima nga si Fredie kang Arnulfo nga nagbitbit og ice pick nga gisuksok sa iyang hawak ug nangutana.
Apan agresibo nga mitubag ang suspek ug niining tungora mibalos sa pagsulti ang biktima sa samang tono nga maoy nakapainit sa sitwasyon ug gilayong gibunot sa suspek ang ice pick ug gidunggab ngadto sa biktima nga si Freddie.
Sa samang higayon mibawos ang biktima pinaagi sa paglabay og botelya apan nasipyat kini ug niining higayona gipahimuslan sa suspek ug pagdunggab sa makaduha ka higayon sa dughan ang biktima una pa miikyas sa dapit.
Dugang pa,nasayran nga daan nang adunay panagtigi ang suspek ug biktima kalabot sa trabaho niini sa construction site.
Ug niining tungora si Romnick Enego Flores, kinsa laing kauban sa trabaho sa biktima, nigamit ug motorsiklo aron ihatod ang biktima ngadto sa Corazon C. Aquino Hospital aron matambalan diin naka angkon ug daghang samad dinunggaban sa kalawasan.
Samtang ang suspek, temporaryo karong gitanggong sa estasyon sa kapulisan samtang nagpaabot sa pagpasaka og pormal nga reklamo sa korte. (Medalyn U. Borja)
(Source: Dipolog CPS)