Tingkagol karon ang usa ka 40 anyos nga lalaki human nadakpan sa kapulisan sa usa ka buy-bust operation batok sa ginadiling droga sa Barangay Del Pilar, lungsod sa Piñan, kaniadtong Disyembre 28, 2025.
Sumala sa Piñan Municipal Police Station (MPS), ang suspek nga si alyas “Marlo,” residente sa Purok Okra sa nasangpit nga lugat, ug positibo nga nadakpan ang suspek atol sa operasyon human mopasa og shabu sa usa ka police poseur-buyer.
Nakuha gikan sa suspek ang gamay nga pakete sa shabu nga nagsilbing buy-bust item, lakip ang ₱500 nga gimarkahang kwarta nga gigamit sa transaksiyon. Sa dugang pang frisking, nasakmit usab ang laing tulo ka gagmayng pakete sa gituohang shabu ug pipila ka non-drug items.
Mokabat og usa ka gramo ang kinatibuk-ang timbang sa nasakmit nga shabu nga gibanabanaang kantidad nga ₱6,800.
Karon anaa na sa kustodiya sa Piñan MPS ang suspek ug mag-atubang og kaso sa paglapas sa Republic Act 9165 o ang Comprehensive Dangerous Drugs Act of 2002. Samtang, ang tanang nakuhang ebidensiya giturn-over na sa Liloy Satellite Forensic Unit sa Zamboanga del Norte alang sa laboratory examination.(IKEN B. GULLEM)
Source: Piñan MPS