Naangol ang usa ka lalaki nga giingong nakainom og ilimnong makahubog human maaksidente sa Barangay Villa M. Tejero, Liloy, Zamboanga del Norte, diin midali usab og responde ang Emergency Medical Services sa Liloy Municipal Fire Station.
Pag-abot sa mga responder, ilang nasuta nga ang pasyente alerto ug responsive apan adunay mga samad sa nawong, mga kamot, ug mga tiil. Namatikdan usab sa mga responder ang baho sa ilimnong makahubog gikan sa pasyente, bisan wala silay nakit-ang grabeng kadaot nga makapameligro dayon sa iyang kinabuhi.
Gihatagan dayon og first aid ang pasyente pinaagi sa paghinlo ug pagtambal sa iyang mga samad, samtang gipadayon ang pagmonitor sa iyang kahimtang ug ang pag-amping sa iyang liog isip kabahin sa pre-hospital emergency care.
Human sa inisyal nga pag-atiman, gidala sa BFP ambulance ang pasyente ngadto sa Liloy Integrated Health District Hospital alang sa dugang ebalwasyon ug pagtambal, diin luwas siyang gitugyan sa mga medical personnel uban sa tanang assessment findings ug pre-hospital care nga nahatag.(JENIFFER JR. DELICA)
Source: BFP R9 Liloy Fire Station