Usa ka organisado ug malinawon nga Lakad Kalayaan 2026 ang gipahigayon sa syudad sa Dipolog isip paghinumdom sa ika-84 nga Araw ng Kagitingan.
Sa alas-7 sa buntag, dungan nga milahok ang mga beterano, active ug reserve forces sa Philippine Army, ROTC cadets, ug mga sakop sa PNP, BFP, ug PCG sa Freedom March nga nagpakita sa panaghiusa sa nagkalain-laing sektor.
Ang martsa mitapos sa Provincial Capitol Grounds diin gihimo ang flag raising ceremony, sunod ang opisyal nga programa ug usa ka minutong kahilom isip pagpasidungog sa mga bayani nga nagsakripisyo sa panahon sa gubat, ilabi na sa mga panghitabo sa Bataan Death March.
Gipadayag sa mga tig-organisa nga ang Lakad Kalayaan usa ka simbolikong kalihokan nga nagtumong sa pagpahinumdom sa kahinungdanon sa kagitingan ug pagkahimakas sa kagawasan sa nasud.
Mitambong usab ang mga representante sa militar, lokal nga gobyerno, ug kabatan-onan nga nagpakita og suporta pinaagi sa aktibong partisipasyon sa kalihokan.
Sa kinatibuk-an, ang Lakad Kalayaan 2026 nahimong usa ka pormal ug makasaysayanong pagtigum nga nagpalig-on sa diwa sa kagitingan ug pagkahimakas sa kagawasan sa Pilipinas.(IKEN B. GULLEM)
Source: Zamboanga del Norte Provincial News Network