Nagsugod na ang Cebu Provincial Government sa pagpahigayon og sunod-sunod nga public hearings sa tibuok probinsya alang sa gisugyot nga Schedule of Market Values (SMV) sa mga yuta ug kabtangan para sa 2027.
Kini nga lakang, nga pangunahan sa Provincial Assessor’s Office, gitan-aw nga adunay direktang epekto sa buhis sa kabtangan, kita sa lokal nga panggamhanan, ug plano sa pamuhunan sa 44 ka lungsod sa Cebu.
Tumong sa programa ang pagbutang og patas, parehas, ug transparent nga basehan sa pag-appraise ug pag-assess sa real properties, subay sa kasamtangang kahimtang sa merkado ug uyon sa Republic Act No. 12001 o RPVARA.
Ang bag-ong SMV maoy gamiton nga opisyal nga basihan sa pagkwenta sa bili sa yuta ug uban pang kabtangan. Sumala sa Kapitolyo, obligado kini ilawom sa balaod ug importante aron masiguro nga ang mga bili sa yuta mosubay sa kasamtangang kahimtang, nga makabenepisyo sa probinsya, mga lungsod, ug sa katawhang Sugboanon.
Matud ni Michelle Languido, Provincial Assessor sa Cebu, nagsugod na ang mga konsultasyon diin nahuman na ang public hearings sa Cordova niadtong Abril 6 ug sa San Fernando niadtong Abril 7.
Nagpadayon usab ang team sa ilang sunod nga schedule sa Moalboal ug uban pang lungsod sa probinsya.
Ang maong mga public hearing gitumong aron ipasabot sa publiko kung giunsa pagdeterminar ang bili sa kabtangan, ipresentar ang mga datos sa gisugyot nga valuation, ug maminaw sa mga pangutana, suhestiyon, ug kabalaka sa katawhan. Kini usab kabahin sa pagpalig-on sa transparency sa dili pa isumiter ang proposal alang sa national review ug approval.
Gidasig ni Languido ang tanang stakeholders sama sa property owners, taxpayers, real estate practitioners, ug uban pang interesadong partido nga aktibong motambong ug moapil sa konsultasyon aron masiguro nga ang SMV magpakita sa tinuod nga kahimtang sa komunidad.
Human makompleto, isumiter ang proposed SMV ngadto sa Bureau of Local Government Finance alang sa pag-review ug pag-aprubar, samtang gipadayon sa Kapitolyo ang ilang komitment sa usa ka patas, makiangayon, ug transparent nga sistema sa pag-assess sa real properties sa probinsya.
Source: Cebu Province PIO
I via Renante Socia Lada