Gihatagan og bag-ong wheelchair ang unom ka Persons with Disability (PWDs) sa Pres. Manuel A. Roxas, Zamboanga del Norte, aron matabangan sila sa ilang adlaw-adlaw nga paglihok ug mga panginahanglanon.
Gitunol ang mga wheelchair sa Provincial Social Welfare and Development Office (PSWDO) atol sa pagsaulog sa 48th National Disability Rights Week sa lungsod niadtong Hulyo 27, 2026.
Ang programa gipahigayon ubos sa administrasyon ni Governor Darel Dexter T. Uy, diin gipasiugda ang padayong suporta sa provincial government alang sa kaayohan ug mga panginahanglan sa mga PWD.
Lakip sa mga nakadawat sila si Linda Cartajenas, 79 anyos; Jocelyn Bulaqueña, 64 anyos; Precil Tindugan, 50 anyos; ug Teresita Lagutin, 60 anyos, uban pa nga mga benepisyaryo.
Gipasalamatan ni Pres. Manuel A. Roxas Mayor Ismael Rengquijo Jr. ang provincial government sa paghatag og mga kagamitan nga makatabang sa mga PWD nga mas mapadali ang ilang paglihok ug pag-atiman sa ilang adlaw-adlaw nga panginahanglan.
Gawas sa wheelchair assistance, gihatagan usab og impormasyon ang mga PWD bahin sa mga oportunidad ug serbisyo nga ilang mapahimuslan. Gipresentar sa Technical Education and Skills Development Authority (TESDA) ang mga programa alang sa pagpalambo sa kahanas ug panginabuhian, samtang gipatin-aw sa PhilHealth ang mga benepisyo ug serbisyo nga anaa alang kanila.(IKEN B. GULLEM)
Source: Zamboanga del Norte Provincial News Network