Gipakita pag-usab sa dakbayan sa Dipolog ang lig-on nga tinguha alang sa mga imprastraktura human matuman ang tulo ka mahinungdanong proyekto nga naghatag og kaayohan sa nagkalain-laing barangay sa siyudad.
Sumala sa Monthly Project Status Report sa City Engineering Office nga gisumite kang Mayor Roberto Y. Uy, lakip sa nahuman ang rehabilitasyon sa culvert pipes ug creek clearing sa Barangay Minaog. Ang maong proyekto may gigahin nga P500,000 apan mikabat lamang sa P224,099 ang aktuwal nga nagasto, nga nakapadaginot sa pondo sa siyudad.
Nahuman usab ang pag-ayo sa konkretong dalan sa Justice Guardson Lood Road (Galas-Gulayon Road) nga adunay pondo nga P1.2 milyon. Natapos kini niadtong Enero 4, 2026, uban sa aktuwal nga gasto nga P944,112.35.
Sa Barangay Sta. Isabel, nahuman ang pagkonkreto sa 88-metros nga dalan uban sa 120-metros nga drainage canal sa Purok 2, Dugwell. Kini adunay alokasyon nga P1.24 milyon ug natapos niadtong Disyembre 3, 2025.
Matud sa City Engineering Office, ang kadaghanan sa mga proyekto gipatuman pinaagi sa administrasyon, nga nakaamot sa episyenteng paggamit sa pondo samtang nagpadayon ang pagserbisyo alang sa katawhan.(IKEN B. GULLEM)
Source: Dipolog City Government