Pormal nga mihimo og panamilit si Patricio S. Tomales, Commander sa Philippine Army Reserve Command (PA ResCom), ngadto kang Zamboanga del Norte Governor Darel Dexter T. Uy atol sa iyang Exit Call sa Kapitolyo kagapong adlawa, Pebrero 18, 2026.
Nagsilbi kining pormal nga pahibalo sa iyang pagbalhin og assignment gikan sa Mindanao padulong sa Luzon. Atol sa usa ka mubo nga panag-istoryahanay, iyang gipadayag ang pasalamat sa suporta nga gihatag sa probinsyal nga panggamhanan sa mga programa sa Reserve Command samtang siya nagserbisyo dinhi sa rehiyon.
Usa sa mga nahisgutan sa maong panagkita mao ang padayon nga pagpalambo sa training center sa PA ResCom nga nahimutang sa Punta Blanca, Manukan. Sumala sa mga opisyal, tumong nila nga mas mapalig-on ang kapasidad sa mga reservists pinaagi sa dugang nga pagbansay ug modernong pasilidad.
Gipahimulos usab ni Gov. Uy ang higayon sa paghisgot sa iyang mga prayoridad alang sa probinsya, lakip ang pagpalambo sa turismo ug pagpatuman sa dagkong infrastructure projects nga nagkantidad og bilyones ka pesos.
Sa katapusan, gipresentar sa Reserve Command ang ilang nagpadayon nga mga programa sa probinsya, ilabi na ang pagdani sa mga interesadong indibidwal nga mahimong kabahin sa reservist force.(IKEN B. GULLEM)
Source: Zamboanga del Norte Provincial News Network