Nakaangkon og bag-ong pinuy-anan ang usa ka pamilya sa Villa Hermosa, Polanco human sa turn-over ug house blessing ceremony nga gipahigayon niadtong Pebrero 17, 2026, pinaagi sa Project Bahay-Pag-asa sa 1st Zamboanga del Norte Mobile Force Company (1st ZNMFC).
Gipasiugdahan ang maong programa sa 1st ZNMFC ubos sa pagpangulo ni PLtCol Ryan Jay R. Capurcos, uban sa suporta sa 1st ZNMFC Advisory Group for Police Transformation and Development (AGPTD) nga gipangulohan ni Dr. Cesar Bala.
Gipaluyohan usab kini ni Zamboanga del Norte 1st District Congressman Roberto Pinpin Uy, Reggie Uy, Elson Uy ug uban pang mga donors.
Ang benepisyaryo sa proyekto ang pamilya ni Matthew Jane B. Jaictin, siyam ka tuig ang panuigon nga adunay kondisyon nga hydrocephalus, nga nakasulod usab sa “Adopt-a-Family Program” sa 1st ZNMFC.
Nagpasalamat usab si Lou Jane Balagot, inahan ni Matthew Jane, sa 1st ZNMFC, AGPTD, mga opisyal sa lungsod sa Polanco ug Barangay Villa Hermosa, ingon man sa tanang naghatag og suporta nga nahimong hinungdan sa ilang pag-angkon og bag-ong panimalay.(IKEN B. GULLEM)
Source: Zambonorte del Norte Provincial News Network