Nakaangkon og bag-ong imprastruktura ang pipila ka barangay sa lungsod sa Leon B. Postigo human giturn-over ang daghang proyekto nga gitumong sa pagpanalipod batok sa baha ug pagpaayo sa kadalanan sa komunidad.
Gipangunahan ni Ian Amatong, kongresista sa ikatulong distrito sa Zamboanga del Norte, ang turnover sa mga proyekto nga kabahin sa mga inisyatibo sa pagpalambo sa imprastruktura sa mga kabarangayan.
Lakip sa mga nahuman nga proyekto ang flood control structures sa Barangay Talinga ug Barangay Palandok (upstream ug downstream), road concreting project sa Barangay Tinuyop, ug barangay hall o multi-purpose building sa Barangay Sipacong.
Kini nga mga proyekto gi-implementar sa Department of Public Works and Highways aron mapalig-on ang imprastruktura ug mapanalipdan ang mga residente batok sa peligro sa pagbaha, samtang gipadali usab ang pagbiyahe sa mga kadalanan sa lungsod.
Niuban usab sa turnover ang mga opisyal sa ikatulong distrito lakip sila JR Brillantes ug Venus Uy, kauban ang mga barangay officials ug representante sa komunidad.(IKEN B. GULLEM)
Source: Zamboanga del Norte Provincial News Network