Mas gipalig-on pa ang digital skills sa kababayen-an pinaagi sa Basic Digital Literacy Training for Women nga gipahigayon niadtong milabay nga adlaw Marso 6, 2026 sa opisina sa Department of Information and Communications Technology (DICT) sa Barangay Biasong, ning siyudad sa Dipolog.
Kini nga selebrasyon kabahin sa National Women’s Month ug gitumong sa paghatag og batakang kahibalo sa paggamit sa internet ug digital platforms aron mas mapalapdan ang oportunidad sa kababayen-an sa digital nga panahon.
Gipahigayon kini sa City Government of Dipolog pinaagi sa City Social Welfare and Development Office (CSWDO) ug Dipolog Tech4Ed Center, sa pakigtambayayong sa DICT–Zamboanga del Norte ug sa LGU sa Barangay Diwan.
Mipahayag usab og mensahe sa kalihokan si Barangay Diwan Punong Barangay Rosebeth B. Turno ug Assistant City Social Welfare Development Officer Jovencia D. Gregory, samtang gipangunahan sa mga resource speaker ang pagbansay sa mga partisipanteng kababayen-an.(IKEN B. GULLEM)
Source: City Government of Dapitan