Gisugdan na sa lokal nga gobyerno ang usa ka mas moderno ug organisadong pamaagi sa pagbaligya og barato nga bugas pinaagi sa paglunsad sa QR Code system alang sa P20 “Rice for All” Program niadtong Abril 13 sa D’ Food Hub and Events Center sa Dipolog Boulevard.
Sumala kang City Agriculturist Engr. Kerr N. Porlas, ang bag-ong sistema nagtumong sa pagpasayon ug pagpaspas sa distribusyon sa bugas nga nagkantidad og P20 matag kilo, samtang gisiguro ang husto ug patas nga paghatag niini sa mga benepisyaryo.
Pinaagi sa QR Code registration, ang matag rehistradong indibidwal mahimong makapalit og hangtod 10 ka kilo sa matag transaksyon, uban sa maximum nga 30 ka kilo matag bulan. Gilauman nga pinaagi niini, malikayan ang kalibog sa pila, doble nga pag-avail, ug uban pang isyu sa distribusyon.
Sa pagkakaron, pilot implementation pa ang gihimo sa upat ka barangay, Miputak, Barra, Central ug Estaka—aron masubay ang sistema, samtang giawhag ang tanang interesadong residente nga magparehistro aron makabenepisyo sa programa nga nagtumong sa paghatag og abot-kayang bugas sa katawhan.(IKEN B. GULLEM)
Source: Dipolog City Government