Nagpahigayon og mas estratehikong pagtagbo ang City Peace and Order Council (CPOC) sa Dapitan niadtong Abril 13 sa New Government Center Amphitheater, diin gipunting ang pagpalig-on sa koordinasyon sa mga ahensya ug pagpaayo sa mga pamaagi aron mapadayon ang kalinaw ug kahusay sa siyudad.
Gipangulohan ni Mayor Evelyn “Belen” T. Uy ang maong ikaduhang quarter nga miting, diin iyang gipasiugda ang panginahanglan sa mas proaktibong aksyon aron malikayan ang posibleng hulga sa seguridad ug maprotektahan ang katawhan.
Sa miting, gihisgutan sa konseho ang kasamtangang kahimtang sa peace and order sa siyudad, lakip ang mga nahimo sa miaging mga bulan ug ang mga plano ug programa alang sa mosunod nga quarter. Gipresentar sa mga uniformed agencies ang ilang mga lakang aron mas mapalig-on ang seguridad sa komunidad.
Usa sa mga giatiman nga isyu mao ang resolusyon alang sa paggamit sa Confidential Fund sa mayor alang sa ikaduhang quarter sa 2026, nga gitumong sa pagpalig-on sa intelligence ug security operations. Gidiskusyunan usab ang Memorandum Circular No. 2026-02 nga nag-awhag sa pagpasa og lokal nga mga ordinansa alang sa mas luwas nga mga komunidad ug ang paghatag og prayoridad sa public safety sa tanang LGU.
Gisusi usab sa konseho ang mga pamaagi sa pag-atubang sa epekto sa nagkataas nga presyo sa lana, lakip ang mga mitigasyon nga makatabang sa katawhan. Apil sa agenda ang Early Childhood Care and Development nga may kalabotan sa peace and order, ingon man ang pagpalig-on sa child protection programs sa siyudad.(IKEN B. GULLEM)
Source: City Government of Dapitan