Gipakusog sa mga personahe sa Labason ug Malintuboan Fire Sub-Station ang kaandam batok sa linog pinaagi sa National Simultaneous Earthquake Drill nga gipahigayon sa Saint Mary’s College of Labason niadtong Septiyembre 10, 2026.
Gipangulohan ni FO3 Sherwin Brylle E. Gom-os, Acting Fire Sub-Station Commander, ang Malintuboan FSS sa pagpatuman sa tukmang safety procedures atol sa earthquake simulation, ubos sa pagdumala ni FINSP Joel S. Sabijon, Acting Municipal Fire Marshal.
Gipraktis sa mga responder ang “Duck,Cover, and Hold” isip unang lakang sa pagpanalipod sa kaugalingon panahon sa kusog nga pagtay-og sa yuta.
Kauban usab sa drill ang MDRRMC ug PNP-Labason, diin gisulayan ang koordinasyon, komunikasyon ug pagtinabangay sa nagkalain-laing ahensya aron masiguro ang mas paspas ug hapsay nga responde kung adunay tinuod nga emerhensya.
Padayon nga gipasiugda sa Labason Municipal Fire Station ug Malintuboan FSS ang kahinungdanon sa pagpangandam, tungod kay sa hustong kahibalo ug praktis, mas daghang kinabuhi ang mahimong mapanalipdan panahon sa katalagman.(MEDALYN U. BORJA)
Source: BFP R9 Malintuboan FSS