Gipahinumdoman ang mga nagdumala sa Community-Based Forest Management Agreement (CBFMA) sa Barangay Znac sa ilang dakong responsibilidad sa pagpanalipod sa kalasangan atol sa information drive nga gipahigayon sa DENR-CENRO Liloy, Septiyembre 12,2026.
Gipatin-aw sa mga resource person ang mga lagda sa paggamit sa mga kahinguhaan sa kalasangan, lakip ang hustong proseso sa pagkuha og permiso alang sa pagputol sa kahoy sulod sa mga lugar nga sakop sa CBFMA.
Gihatagan usab niini og gibug-aton ang Executive Order No. 23,nga nagdili sa pagputol ug pag-ani sa troso gikan sa natural ug residual forests, ingon man ang papel sa Anti-Illegal Logging Task Force sa pagpugong sa ilegal nga kalihokan sa kalasangan.
Lakip sa gihisgutan ang P.D. 705 o Revised Forestry Code, R.A. 9175 o Chain Saw Act of 2002,ug R.A.9147 o Wildlife Act,nga nagtumong sa pagpanalipod dili lamang sa mga kahoy kondili usab sa mga mananap ug ilang natural nga puy-anan.
Pinaagi sa maong IEC campaign, gipalig-on sa DENR-CENRO Liloy ang kahibalo sa mga CBFMA holders aron malikayan ang mga kalapasan ug mapadayon ang responsableng pagdumala sa mga kahinguhaan sa kalasangan.
Gipasiugda usab nga ang aktibong partisipasyon sa komunidad importante aron mapreserbar ang kalasangan ug biodiversity alang sa umaabot nga henerasyon.(MEDALYN U. BORJA)
Source: DENR Zamboanga Peninsula