Nagkahiusa ang nagkalain-laing ahensya sa gobyerno aron mapaduol ang importanteng serbisyo ngadto sa mga pamilya sa Piñan pinaagi sa Provincial Team Kuyog Ta! Medical ug Serbisyo Caravan, uban sa GC Services on Wheels, nga gipahigayon sa Barangay Poblacion North.
Dili lamang usa ka matang sa serbisyo ang gidala sa maong caravan, kondili naglangkob kini sa panglawas, panginabuhian, seguridad, dokumentasyon ug uban pang panginahanglan sa komunidad.
Sa sektor sa panglawas, naghatag ang Provincial Health Office, ubos sa pagdumala ni OIC-PHO Dr. Benson Panaguiton, og libreng medical check-up, tambal, dental services ug oatmeal.
Alang sa mga pamilya nga gustong makadugang sa ilang pagkaon pinaagi sa pagpanguma, nag-apod-apod usab ang Provincial Agriculture Office og vegetable seeds ug ready-to-plant seedlings sama sa kamatis ug talong.
Dugang nga serbisyo alang sa kahayupan ang gipadangat sa Provincial Veterinary Office, ubos sa pagpanguna ni Provincial Veterinarian Dr. Sunday Dawn R. Bagatua, lakip ang anti-rabies vaccination, vitamins ug uban pang veterinary assistance.
Gipaduol usab sa mga residente ang PhilHealth profiling, PSA National ID registration, libreng birth registration pinaagi sa Municipal Civil Registrar, PSWDO assistance ug impormasyon bahin sa hustong pag-segregate sa basura.
Mitabang ang LGU Piñan Rural Health Unit ug Bureau of Fire Protection (BFP) sa vital signs checking ug registration sa mga benepisyaryo, samtang ang PNP-Piñan naghatag usab og libreng pagpang-alot.
Gipasalamatan ni Piñan Municipal Vice Mayor Benedicto C. Cainta II si 1st District Congressman Roberto “Pinpin” Uy ug ang Provincial Government ubos sa pagpanguna ni Governor Darel Dexter T. Uy tungod sa ilang pagtinabangay aron mapaduol ang serbisyo sa gobyerno ngadto sa katawhan.
Ang maong inisyatiba nagpakita nga ang paghatag og serbisyo mahimong mas epektibo kung ang nagkalain-laing ahensya maghiusa sa pagdala sa ilang mga programa direkta ngadto sa mga komunidad nga nanginahanglan niini.(IKEN B. GULLEM)
Source: Zamboanga del Norte Provincial News Network