Mas napaduol sa mga kooperatiba ug ilang mga miyembro ang mga serbisyong gikinahanglan human malampusong gipahigayon ang “Koop Serbisyo Caravan” niadtong Marso 18, 2026 sa Social Hall sa City Hall dinhi sa siyudad sa Dipolog.
Gipangunahan ang kalihokan sa Cooperative Development Authority (CDA) Region IX ubos sa pamuno ni Regional Director Ruben Cunanan, JD, uban ang Dipolog City Cooperative Development Office nga gidumala ni City Cooperative Development Officer Elena Doris R. Sarande, MBA.
Tumong sa maong caravan ang paghatag dayon ug diretsong serbisyo sa mga lokal nga kooperatiba, ilabi na sa ilang mga dokumentaryong panginahanglan. Usa sa mga pangunahing serbisyo nga gihatag mao ang pag-isyu sa Certificates of Compliance, usa ka importante nga rekisito matag tuig alang sa pag-renew sa business permit sa mga kooperatiba.
Kini nga inisyatibo kabahin sa padayon nga paningkamot sa gobyerno nga mapalig-on ang sektor sa kooperatiba pinaagi sa mas sayon ug paspas nga pag-access sa mga serbisyo. Dugang pa, gilauman nga pinaagi niini mapalambo ang pagsunod sa mga regulasyon ug mapadali ang operasyon sa mga kooperatiba sa siyudad.(IKEN B. GULLEM)
Source: Dipolog City Government