Gisugdan na sa City Government of Dapitan ang selebrasyon sa Kinabayo Festival 2026 pinaagi sa ceremonial gong striking, nga nagsimbolo sa pag-abli sa usa sa labing gipaabot nga kasaulogan sa siyudad.
Gipangulohan ni First District Representative Roberto “Pinpin” Uy Jr. ang ceremonial gong striking uban ni Dapitan City Vice Mayor Gabriel M. Cad ug uban pang mga opisyal sa lokal ug probinsyal nga panggamhanan.
Sa iyang mensahe, giingon ni Vice Mayor Cad nga ang Kinabayo usa ka higayon aron lig-onon ang pagtuo, ampingan ang kultura, ug palig-onon ang panaghiusa sa mga Dapitanon.
Samtang, gipasiugda ni Cong. Pinpin Uy Jr. nga ang Kinabayo dili lamang usa ka tinuig nga kasaulogan kondili simbolo usab sa panaghiusa, kalig-on, ug padayong kalamboan sa Dapitan. Matud pa niya, nagpadayon ang siyudad sa pagbalanse sa pagpreserbar sa kultura samtang gipalambo ang ekonomiya, maayong pangagamhanan, ug serbisyo publiko.
Lakip sa mga highlight sa pagbukas ang paglunsad sa opisyal nga emblema ug theme song sa Kinabayo Festival 2026, nga nagpakita sa padayon nga debosyon sa mga Dapitanon kang Señor Santiago ug sa ilang hiniusang identidad isip komunidad.
Kini nga Kinabayo Festival 2026 magpadayon hangtod Hulyo 25, diin gikatakdang ipahigayon ang nagkadaiyang relihiyoso, kultural, pang-sports, ug turismo nga mga kalihokan.(IKEN B. GULLEM)
Source: Dapitan City Government