Giduso ni First District Representative Cong. Ian Amatong ang pagpalapad sa mga proyekto sa irigasyon ug skills training atol sa sunod-sunod nga miting uban sa mga opisyal sa TESDA ug National Irrigation Administration (NIA) sa Ganase, Liloy.
Sa pakigpulong sa TESDA Zamboanga del Norte, gihisgutan ang pag-angay sa mga programa sa pagbansay aron matubag ang panginahanglan sa mga umaabot nga mamumuhunan sa industriya sa lubi, dragon fruit, abaca, rubber, ug cacao. Lakip usab sa gihisgutan ang pagpalambo sa potensyal sa Lamao Port ug ang paglig-on sa tinuig nga mga programa sa skills training.
Samtang sa miting uban sa NIA Zamboanga del Norte, gihangyo ni Amatong ang ahensya nga hatagan og prayoridad ang dugang nga mga proyekto sa irigasyon, ilabina ang solar irrigation ug mga dagkong irrigation system. Matud pa kaniya, dako ang potensyal sa agrikultura sa unang distrito apan dugay na kining nakulangan sa mga proyekto sa irigasyon.
Ang mga panaghisgot gitumong sa pagdasig sa agrikultura, pagdani og pamuhunan, ug paghimo og mas daghang oportunidad sa trabaho alang sa mga lumulupyo sa unang distrito.(IKEN B. GULLEM)
Source: Team Adrian Amatong