Gilunsad sa Provincial Government of Zamboanga del Norte pinaagi sa Provincial Social Welfare and Development Office (PSWDO) ang usa ka donation drive aron makahatag og dinaliang tabang sa mga pamilyang naapektuhan sa bag-ong linog sa General Santos City ug sa Lalawigan sa Sarangani.
Gidasig sa provincial government ang mga indibiduwal, pribadong organisasyon, ahensya sa gobyerno ug ubang sektor sa komunidad nga moapil sa hiniusang paningkamot pinaagi sa pagdonar og mga relief goods ug uban pang kinahanglanon alang sa mga biktima sa katalagman.
Lakip sa mga donasyong dawaton ang tolda, bottled water, andam kan-on nga pagkaon, de-lata, habol, sanitary kits, ug mga materyales nga magamit sa temporaryong kapuy-an ug pag-ayo sa mga nadaot nga kabtangan sa mga apektadong pamilya.
Magpadayon ang donation drive gikan Hunyo 10 hangtod Hunyo 17, 2026 sa opisina sa PSWDO sa Provincial Capitol Building sa Estaka, Dipolog City. Sumala sa provincial government, ang matag donasyon adunay dakong papel sa paghatag og kahupayan ug paglaom sa mga biktima samtang nagpadayon ang ilang pagbangon gikan sa epekto sa linog.(JENIFFER JR. DELICA)
Source: Zamboanga del Norte Provincial News Network