Daghan nga katawhan sa Jose Dalman, Zamboanga del Norte ang nakapahimulos sa libreng serbisyong panglawas human gidala sa lungsod ang Care to Love and Share Program sa Philippine Councilors League (PCL) Zamboanga del Norte Chapter, kaniadtong Enero 23, 2026.
Ang maong kalihukan nagtanyag og nagkadaiyang medical ug dental services lakip ang general check-up, animal bite treatment, ibot sa ngipon, X-ray, deworming, ug bakuna batok measles ug rubella alang sa gagmay’ng kabataan.
Gibutyag sa PCL nga ang programa kabahin sa ilang padayong paningkamot nga madala ang serbisyong panglawas bisan sa mga lagyong barangay sa probinsya. Gipasiugda usab nga ang pundo sa organisasyon gigamit diretso alang sa kaayohan sa katawhan.
Samtang atol sa kalihukan, gipahigayon ang paghatag og honorarium sa mga Barangay Health Workers, Child Development Workers, ug Barangay Nutrition Scholars isip pag-ila sa ilang dakong papel sa pag-atiman sa komunidad.
Gipahayag usab sa Provincial Health Office nga padayon ang pagpalig-on sa mga medical mission pinaagi sa modernong kagamitan aron mas episyente ug luwas ang paghatag og serbisyo. Nagpasalamat usab ang lokal nga kagamhanan sa suporta sa probinsyal nga administrasyon sa pagpaabot sa maong programa ngadto sa Jose Dalman.(IKEN B. GULLEM)
Source: Zamboanga del Norte Provincial News Network