Dili matukib ang kalipay sa mga lumulupyo sa Barangay Galas, dakbayan sa Dipolog, human gipadangat ang Gugma Ayuda Ni Nanay Nene sa Galas Elementary School sa nasangpit nga lugar, Hulyo 15, niining tuiga.
Si Lola Juanita Cadano Ortiz, 83 anyos nanimuyo sa South Baybay, Galas usa sa liboan nga nakapahimulos sa Gugma Ayuda Ni Nanay Nene, midayeg sa administrasyong Jalosjos tungod kay kanunay sila makatagamtam sa mga ayuda gikan sa kagamhanang probinsyal.
Mapasalamaton si Lola Juanita kang Governor Rosalina “Nanay Nene” Jalosjos sa padayong paghatag ayuda sa mga nanginahanglan nga katawhan ilabina sama kanilang mga senior citizen.
Dako ang kalipay sa pipila ka katawhan nga doble ang nadawat nga tag-5 ka kilong commercial rice human sila gi-swerte sa raffle draw ug laing gipanghatag nga lima ka kilo matag indibidwal.
Mismo si Provincial Social Welfare and Development Officer Dr. Jose “Pepe” Mante, Jerbis Jalosjos uban sa mga kawani sa PSWDO ang mihatag ug miapod-apod ngadto sa katawhan sa Galas sa mokabat sa 6,000 ka tag-5 ka kilong bugas.
Samtang, lamian nga champorado ang gidalit sa Provincial Nutrition Office ug PSWDO isip Supplemental Mass Feeding Program.
Adunay purga, bitamina, anti-rabbies sa iro ug iring, 200 ka carabao milk ice candy ang gidalit sa Provincial Veterinarian Office (PROVET).
Nanghatag usab sa 682 nga organic fertilizer ug 754 ka putos sa mga liso sa utanon, ang Office of the Provincial Agriculturist (OPAg).
Mokabat sa 50 ka indibidwal ang nagpatupi sa mga kawani sa Provincial Disaster Risk Reduction and Management Office (PDRRMO).
(Source: Provincial Information Center ZaNorte Facebook page)