Puno sa kalipay ang 2,626 ka pamilya sa Sindangan human personal nga giablihan ni Mayor Glona G. Labadlabad ang sayo nga Pinaskohan sa lungsod pinaagi sa paghatag og bugas ug sardinas sa upat ka barangay—Bantayan, Poblacion, Gampis, ug Lawis.
Matag panimalay nakadawat og 10 kilos nga bugas ug upat ka lata nga sardinas, usa ka paunang regalo nga nagdala og kahayag ug pagbati sa kapaskuhan sa komunidad. Makita niini ang tinguha sa LGU Sindangan nga ipabati dayon sa katawhan ang espiritu sa Pasko nga mao ang pagtinabangay ug paglaom.
Magpadayon usab ang pag-apod-apod sa uban pang mga barangay sa umaabot nga mga adlaw aron mas daghang pamilya ang mabahinan sa maong panalangin samtang nagpadulong ang lungsod sa mas mainiton nga selebrasyon sa kapaskuhan.(JENIFFER JR. DELICA)
Source: Local Government Unit of Sindangan